ازاى تبقى مصمم ماكينات وخطوط انتاج

مقالات جيدة

المهندس / أحمد ابو الفتوح
https://www.facebook.com/eng.einstin

ازاى تبقى مصمم ماكينات وخطوط انتاج
========================
احتراما لوقتك البوست هياخد منك 3 دقايق .. ومطلوب منك تقرأه مرتين
===========================================
.
ازاى انت كخريج انتاج او ميكاترونكس تكون مصمم ماكينات ؟
.
الخطوة الاولى :
تشيل بعض المعتقدات من دماغك خااااااااااااااااالص .. مثال :-
- الكلية كفاية انها تعمل منك مهندس .
- فيه مواد فى الكلية ملهاش لزمة .
- المواد اللى بندرسها متخلفة وبرا اعلى مننا بكتير .
- بالحب كل حاجة بتمشى .
.
.
الخطوة التانية :
تبني نفسك علميا .. نادر جدا لما تلاقى مصمم ماكينات عندنا فى مصر .. مصمم ماكينات بمفهومه العام .. اللى ترميله اى شغلانة يسلمهالك .. فيه ناس متخصصين تصميم سيور مثلا .. ناس متخصصين تصميم مكن راوتر .. مع احترامي الشديد ليهم لكن مينفعش نسميهم مصممين .. على سبيل المثال .. اول مكنة صممتها كانت سى ان سى .. اخر مكنة صممتها كانت خط تعبئة خبز لبنانى بياخد العيش الخارج من بيت النار ( الفرن ) يرصصه فوق بعضه بعدد معين .. وبعدين يقسمه على اكتر من مخرج .. وبعدين ياخد كيس يفتحه .. وبعدين يحطه جوة الكيس .. وبعدين يقفل الكيس بلحام او لفة سلك بعد ما يسحب منه الهواء .. ويسلمهولك زى ما بتشتريه من الماركت .. ايه علاقتى انا كأحمد بالعيش اللبنانى غير انى بحمصه مع زبدة وتوم واحطه فى الفرن كنوع من انواع المقبلات ؟!!
البناء العلمي بإنك تهتم اوى بدراسة كل كبيرة وصغيرة فى الكلية .. تاخد الكلمتين فى المحاضرة و ترجع تقعد على يوتيوب وتدور على تطبيقها .. ربط المعلومة النظرية بالتطبيق العملي اكتر اداة فعالة لتحصيل المعلومة وسهولة استدعاءها وقت الحاجة .
.
.
الخطوة التالتة :
المعرفة بالسوق ..
لازم تبقى على معرفة جيدة جدا بالسوق .. وبنتكلم هنا عن قطع غيار وموردين .. مثلا ممكن تلف حوالين نفسك شهر علشان تدور على موتور يديك حركة خطية مش دورانية .. وبعد الشهر هتلاقى ان الموتور دا غالى جدا بس هتجيبه لانك مضطر .. فى الوقت اللى ممكن تستخدم بداله فى التطبيق بتاعك سيستم نيوماتيك او هيدروليك .. او سلونويد .. او تجيب موتور عادى خالص و تركب عليه كامة بدراعين وزلاق .. المشكلة دى ممكن تقابلك فى مسمار .. مثال شخصي .. لما كنت فى اول سنة فى الكلية عملت روبوت بيمشى على عجل .. كانت عندي مشكلة عظيمة .. شافت الموتور اصغر من قطر العجلة الداخلي .. قعدت افكر اسبوع فى حلول وفعلا وصلت لحلول كتير .. فى الاخر قلت اجيب حتة ارتيلون و اعمل حشوة بيها على المخرطة تعوض المسافة بين العجلة والشافت .. بعدها اكتشفت ان دى حاجة معروفة واسمها جلبة !! ..
المعرفة بقطع الغيار والموردين هتحتاج منك بالاساس انك تتفرج على ماكينات كتير .. وانك تلف على رجلك كتير .. انزل السبتية الجمهورية نجيب الريحانى مؤسسة الزكاة القللي .. إلخ . واتفرج واسأل عن اللى تشوفه وعن تمنه .
.
.
الخطوة التالتة :
اتفرج على ميكانيزمات بالعبيط .. كل يوم اقعدلك كام ساعة على يوتيوب ..
ركز فى المكن اللى بتشوفه .. اتفرج على كل انواع المكن وخطوط الانتاج اللى تخطر على بالك .. كل مكنة تشوفها اسأل نفسك عن سبب وجود مسمار فى منطقة معينة .. وليه عشق تروس مع بعض منقلش الحركة بجنزير .. طب ليه استخدم سير وبكرة مسننة بدل ما يستخدم جريدة وترس .. طب ليه استخدام هنا سيرفو موتور وهناك موتور بتلاتة تعريفة ..
.
.
الخطوة الرابعة :
اسأل كتير .. شوف حد اكبر منك فى المجال دا واسأله ..
عادة بتكون فيه علاقة طردية بين العلم و التواضع .. فهتلاقى ترحيب بمساعدتك بس برضو تراعي انشغال اللى بتسأله .. وربنا ينفعك بيه و ينفعه بيك ..
.
.
الخطوة الخامسة :
المعارض .. عليك بحضور المعارض ..
فيه معارض كدا مينفعش تفوتها .. ماك تك .. يوزد .. اوتوميشن .. إلخ ..
وياريت تبقى بصحبة حد عنده خبرة تسأله فى كل حاجة تشوفها .. لو رحت لوحدك مش هتستفيد علميا اوى .. وان كنت هتحقق مكسب تاني بإنك تجمع بيانات اتصال مجموعة كبيرة من الشركات و كتالوجاتهم .
.
.
الخطوة السادسة :
برامج التصميم والمحاكاة .. لا غني عنها .
اقفش فى برنامج من البرامج دى واطحنه اوى .. سوليد ووركس .. انفنتور .. كاتيا .. إلخ .. ومعاهم اوتوكاد 2دي .. هيفيدك فى شغل الصاج اوى .. وفى النقطة دى بالذات عايزك تمشى على القاعدة اللى بتقول : اعرف حاجة عن كل حاجة واعرف كل حاجة عن حاجة .. انا مش هقولك شغال ببرنامج ايه لانه ممكن ميناسبكش .. لكن فى اكتر من شغلة لقيت نفسى مش نافع اشتغل بيه ومضطر اشتغل بأنسيز وادامز .. ادامز اللى تقريبا محدش بيستخدمه فى الكوكب غيري انا واتنين تلاتة تانيين ( مزحة .. اضحك هأ هأ هأ ) ...
.
.
الخطوة السابعة :
صمم .. عمال على بطال صمم ..
صمم مكن لنفسك حتى لو مش محتاجه لشغلك .. حتى لو انت لسة طالب .. اعمل مكتبة مليانة فولدرات كل فولدر فيه مكنة او خط انتاج .. ابدأ بحاجات بسيطة و اطلع واحدة واحدة .. كل مرة بتصمم فيها مكنة بتزداد معرفتك وبتمر بمشاكل وتحلها .. فبتتراكم الخبرات عندك .
.
.
الخطوة التامنة :
طرق التصنيع .. نقطة حساسة جدا ..
انت ممكن تعمل سفينة فضاء على الكمبيوتر .. لكن لو جيت تنفذها مش هتعرف .. فلازم تبقى على دراية بطرق التصنيع المتاحة و ايه ممكن يديك النتيجة اللى انت عايزها وايه لا .. وامتى مثلا تستخدم تناية وامتى تستخدم اسطمبة تشكيل صاج .. ودى رجالة انتاج اشطر فيها من ميكاترونكس . وان كان ميكاترونكس عنده نقطة قوة رهيبة .. هى انه قادر يربط بين شكل الكهرباء والميكانيكا فى المكنة ..
.
.
الخطوة التاسعة :
بالنسبة لطلبة ميكاترونكس ..
لازم تبقى على دراية بالكلام دا :
- السنسورات الموجودة فى السوق واسعارها .
- المواتير خاصة الـ AC - Stepper .. وبعدهم ييجي السيرفو ..
- الدرايفرات والانفرتر .
- PLC - HMI
.
.
اسئلة شائعة واجاباتها :-
- اسماء كتب تعلمني تصميم الماكينات ؟
- مفيش .. لكن فيه كتب هتساعدك فى تصميم الاجزاء وفهم تأثير القوى زى كورمي و نورتون وموت .. وكتب تانية مليانة ميكانيزمات زى كتب الماشين .. وفيه كتب مش هتفهمها الا لما ربنا يكرمك وتسجل ماجيستير ودكتوراة وتدرسها .. advanced mechanism design .
.
- ابدأ منين ؟
- متبدأش دلوقتي .. انت فى وقت امتحانات و واجب الوقت انك تبصم علشان تجيب تقدير .. ايوة انا اللى بقولك ابصم .. وبعد الامتحانات صلح غلطتك وهات المناهج من الاول واشتغل على كل اللى قولناه بالتوازى .
.
- انا فى بكالريوس هلحق ؟
- مفيش وقت مثالى للبدء .. ابدء من دلوقتي وربنا يعينك .. مش لازم تكون اول وظيفة ليك مصمم ماكينات .. الوظيفة دى محتاجة شغل كتير على نفسك .. فاديها وقتها ومجهودك ..
.
.
- مين ممكن اسأله فى الموضوع دا ؟!
- اللى اعرفهم شغالين كمصممين اقل من 5 .. مش من الذوق انى انشر موبايلاتهم بدون الاستئذان منهم .. ومعرفش وقتهم يسمح ولا لا .. وانا كمان الوقت عندي ضيق جدا حاليا فعملت جروب ممكن نتجمع عليه والاسئلة تبقى عامة بحيث الكل يستفيد .. بدل اسك و واتس اب و التليفون اللى الاستفادة فيهم بتكون محدودة جدا .. فممكن تشترك فى الجروب من اللينك دا .. https://www.facebook.com/groups/301424263631551